Chemeco d'a terra

Dó quedó l'Aragón d'o polvo, a boira, l'aire y o sol d'o que fablaba o nuestro Labordeta? porque yo nomás veigo ara macro rafal, lindano, trescoles, molins d'aire y panels solars. Poca chen cal saba o que nos pasa, tamién i hai poco intrés en o que ocurra en a "España vaziada" anque bueno, tamién tos digo: España vaziada, vaziada de qué? de chen? No, no nos entivoquemos. Son els os que son vuedos, tanta chen y garra se saluda, garra interactúa con l'atro, garra se mira! No, os vuedos no somos nusatros, a España vueda son els, pero vueda de corazón.

No nomás nos han tirau o nuestro paisache, os nuestros servizios y, por tanto nuestra chen, sino que ara tamién nos tiran l'idioma. S'escudan en o "no, en Aragón se fabla castellano" bueno sí, se fabla castellano, pero por imposizión no nos olbidemos, pero no nomás se fabla castellano, aquí se fabla aragonés (amás d'una variedat de catalán) Afora, a existenzia y importanzia de l'aragonés no ye ampliamén conoxida, en parte, seguramén a causa d'a opresión d'a suya cultura y luenga de le que fablabanos; se busca l'estandard, lo neutro. Lo neutro u o modelo cultural forano impuesto que clisa y infravalora as tradizions autoctonas?

A falta de reconoixenzia ofizial y a falta de conisión con a nuestra istoria han empachau a florada d'una identidat aragonesa unitaria (en a cuala "cheposos", turolenses y "fatos”  no se peleyen) sumiendo a la nuestra rechión en una uambra d'esconoximiento sobre a nuestra rica y enradicada herenzio.

Iste escrito no ye más que una fuella de denunzia, no propongo soluzión porque dengún la quiere escuitar (u ixo reflexan as pasadas eslezions) simplamén cabe dezir:

Aragoneses a defender a tierra!