O gran chuizio

 En ista previa d'o famoso “Halloween” que ya se considera más americano que zelta, fablaremos sobre un suzeso ocurriu en Laspaúles (Uesca) que tenió como resultau l'asesinato de 24 mullers entre os meses de febrero y abril acusadas de broxería. Entre os sieglos XV a lo XIX a Inquisizión teneba a misión de “trobar y erradicar” as broixas que viviban en territorio español, manimenos, en os lugars más aislaus d'o pirineo aragonés como Laspaúles ista misión recayeba sobre conzellos munizipals (exentos de cualsequier tipo d'obchetiva pus teneban ya una opinión bien formada sobre os vezins d'o lugar) Pero zentremo-nos en os feitos, Cómo ye posible que en menos de tres meses 24 mullers isen enforcadas en un chico lugar de Ribagorza?

En Aragón s'alentaba un ambién convulso, feba aproximadamén un año d'a decapitazión d'o Chustizia mayor d'Aragón Juan de Lanuza por orden d'o rei, Felipe II y, a la suya vez, l'exsecretario d'o monarca, Antonio Pérez, pretendeba invadir Aragón dentrando por a val de Tena. Ye prezisamén enmeyo d'ista crispazión cuan encomenza o primer d'os 24 chuizios y en un espazio inferior a 3 meses se suzedioron un dezaga d'unatro toz os chuizios. Toz els culminoron con una condena de muerte en a forca por enverenamiento d'os vezins d'o lugar, secuestro y asesinato de ninos con fins escuras, fabricazión d'untura proitos y de profanazión de calabres.

Cabe destacar que en o plazo de tiempo entre que s'aturaba a l'acusada y se la chuzgaba ista yera sozmetida constanmén a terribles torturas de distinta mena (que no recontaremos por a suya extrema crueldat) ta tratar de rancar-le una confesión d'un delito que podeba u no aber cometiu.

Finalmén, as 24 mullers estioron asasinadas en a forca de forma publica para que tot o lugar podese veyer-lo os suyos nombres yeran Antona Delmás, María de Joan Porter, Antona Moranjo, Isabel Palasín, María Dejela, María la Denuya, Joana Raso, Sesilia Durán, Aldonsa Mur, María Durán, Joana Taulac, Margalida Sen, Margalida Seneta, María Güeri, Catalina Barón, Isabel Arcas, Joana Torrent, Antona Lanas, Catalina Cierço, Margalida Riu, Barbera Herbera, Leunor Reals, Ana Castayn y María Garús. Cualques investigadors fablan d'una vigésimo quinta muller, Margalida Reals, condenada por istos mesmos delitos y en istas mesmas calendatas pero que conseguió escapar d'aquel “infierno terrenar”

Finalmén, en a provinzia de Uesca estioron enforcadas u cremadas en a foguera arredol de 120 mullers entre 1461 y 1645.