Terra de fantasmas

En l’antigo Valle de Tena, en a residencia veranenca d’os Condes de Vinyaza viviba iste feliz matrimonio de conchunta con os suyos dos fillos y Celina, a orrera y institutriz d’os ninos.

Un día de noviembre Celina decidió salir a dar una gambada por a redolada d’o palacete con os ninos, ella levaba un vestiu blanco de seda y paró a almirar o paisache una vez plegoron a la ribera d’o río Caldarés. Aquel paisache, que gosaba estar idilico, luciba absolutamén tetrico y escuro, o sol guaire amostraba un rayo de luz, os arbols ya no teneban fuellas y tasamén s’escuitaban animals.  Celina se quedó absolutamén ensimesmada mirando un au que volaba a la distancia, no sabeba bien si yera un ueitre, un alica u mesmo un cuervo.

Mientres Celina decidiba o suyo veredicto sobre aquella au o carro d’os ninos encomenzó a descender endrezau ta lo río tanto ye asinas que cuan Celina tornó en sí os ninos ya yeran en l’aigua.

En dar-se cuenta d’isto, Celina corrió ta lo río, manimenos, o suyo vestiu s’enganchó a una piedra, sola chilaba pedindo aduya, pero dengún la escuitaba, anguniada a causa d’a impotencia veyió como os ninos s’afogoron dica que, finalmén estransita, ella tamién murió afogada.

Dende alavez, se diz que o suyo esprito ronda a redolada d’o palacete en busca d’os suyos dos ninos mientres sona una canta en o suyo viello piano.

Curiosidaz:

1. En estar una historia de mena popular a historia s’ha iu modificando a lo largo d’os anyos, encara asinas, ye absolutamén zierto que o periodico El pirineo aragonés en 1898 publicó a noticia d’o feneiximiento d’a institutriz y d’un d’os ninos.

2.  En as fiestas de Pueyo de Jaca ye costumbre dixar colgau un monyaco clamau Celina u Celino en a Plaza Mayor d’o lugar entre totas as fiestas y que se cremará o zaguero día de fiestas y se tirará a la fuen.